Sa interview niya sa TV Patrol sinabi niya ang dahilan ay ang kahirapan na mangalap ng kontribusyon para sa eleksyon sa susunod na taon.

Sabi niya, walang kinalaman ang binubuhay ng administrasyon na kaso ng pagpatay sa isang public relations executive na si Bubby Dacer at ang kanyang driver na si Emmanuel Corbito. Hindi raw siya nababahala doon dahil hindi siya sangkot. Naniniwala siyang lalabas ang katotohanan.

Talagang mahirap ang pera ngayon lalo pa sa kanya na hindi mataas ang kanyang rating sa mga survey. Siyempre ang mga mayayaman na maaring mahingi-an ng tulong ay magbibigay sa ina-akala nilang malaki ang tsansa na manalo. At ang isang batayan ay ang ratings.

Sabi ng mga beterano sa pulitika, ang estimate na budget ng isang kandidato para presidente ay hindi bababa ng tatlong bilyong piso. Si Gloria Arroyo noong 2004, inabot sampung bilyon ang ginastos, kasama doon ang pera na galing sa fertilizer scam at sa road users tax.

Maliban kasi sa pamimili ng boto, malaki ang ginastos niya sa pandaraya pagkatapos ng eleksyon lalo pa doon sa Autonmous Region for Muslim Mindanao. Usap-usapan sa mga sundalo ang pera na pinamigay ng isang heneral para sa ginawa nilang pagpalit ng mga numero sa certificate of canvass.
Ang laki din ng ginastos ni Arroyo sa pag-manufacture ng pekeng election returns na ipinalit doon sa ballot boxes na nakatago sa Batasan.

Ngunit kahit hindi ka mandaya malaki pa rin ang perang kailangan. Sa TV ads lang, isa sa mga epektibong instrumento sa kampanya, bilyon na ang aabutin.

Hindi madali ang desisyon ni Lacson dahil iyun ay pag-amin ng kahinaan sa kanyang kampanya. Hindi madali ang tumanggap ng hindi magandang katotohanan.

Kinakailangan ang tapang ng loob at pinakita ni Lacson na meron soiyang nun.

Ang pagwithdraw ni Lacson ay makakatulong sa hanay ng oposisyun. Sabi ni Lacson tutulong siya isang kandidato na magkatugma ang kanilang prinsipyo at pananaw ng public service. Kinikita ko na mamimili si Lacson sa pagitan ni Sen. Mar Roxas at Sen. Chiz Escudero.

Sana hindi na rin itutuloy ni dating Pangulong Estrada .Sana hindi na niya hintayin na i-disqualify siya ng Supreme Court. Tulungan na lang niya ang isa sa mga oposisyon na kandidato na siyang magsusulong na maayos na pamahalaan. Kasama doon ang pag-usig sa mga mandaraya at magnanakaw na katulad ni Gloria Arroyo at ang kanyang mga alagad.

Kahit pa sabihin na may mga loyalist talaga si Estrada, hindi tumataas ang kanyang ratingsa survey. Bumababa pa nga e.

Hahanga din ako kay Estrada kung magw-withdraw din siya.

by: Ellen Tordillas