Sa bilangan kasi ang malakihang dayaan. Kaya kapag hindi manual (yung tao ang magbibilang), naniniwala ako na mababawasan ang dayaan.

Dapat masaya tayo na naayos kontrata ng Smartmatic-TIM at Comelec at tuloy-tuloy na ang computerized election. Kaya lang, mukhang maraming nakatagong mga hindi kanais-nais itong kontrata na ngayon lang lumalabas.Kapag kwestyunable ang kumpanya, medyo nakakatakot sa laki at napaka-importante ng kontratang ito.

Sabi ni Atty. Harry Roque ng Concerned Citizens Movement na ang pumirma sa kontrata sa Comelec at ang Smartmatic International Corporation na nakarehistro sa Pilipinas. Ang kumpanya na magpapatupd ng kontrata, katulad ng pagsupply ng mga computer at mga software ay ang Smartmatic na nakabase sa Netherlands. Meron din nakalagay Barbados.

Kapag meron aberya, sino ang ating hahabulin at saan tayo hahabol?

May inilabas ang VERA Files na report kahapon na ayun sa kontrata ng Smartmatic-TIM at Comelec, bago pa makapag-deliber ang kumpanya ng isang computer na gagamitin sa 2010 na eleksyun, bayad na sila ng 40 porsyento (P3 bilyon) ng P7.2 bilyon na kontrata.

Bago matapos itong buwan ng Hulyo, magbubukas na ng irrevocable letter of credit sa Land Bank ang Comelec para sa buong P7.2 bilyon at doon na magw-withdraw ang Smartmatic-TIM.

Ayun sa kontrata, sabi ng Vera Files, babayaran na ng Comelec and Smartmatic TIM Corp. ng P2.5 bilyon para sa counting machines na tinatawag nilang Precinct Count Optical Scan (PCOS) na idi-deliber pa lang sa Nobiembre 2009 ng 12,000 na units; sa Disyembre 2009, 30,000; sa Enero 2010 panibagong 30,000 at sa Pebrero 2010, ang pinkahuling delivery ng 12,200 units.

Kahapon nag-file sa Supreme Court ng motion sina Roque na ihinto muna ang pagbayad sa Smartmatic-TIM habang nire-resolba pa ang legalidad ng kanilang kontrata. Sabi ni Roque baka maparehas na naman yan sa nabulilyaso na P1.3 bilyon kontrata sa Mega Pacific.

Walang nangyari doon sa mga makinang nakuha ng Comelec sa Mega Pacific at nabubulok na lang sa mga bodega. Nalugi ng P1.3 bilyon ang taumbayan at walang nakakulong. Kampante pa rin si dating Comelec Chairman Benjamin Abalos at ang kanyang mga galamay.

Dahil sa gahol sa oras, marami ang sadyang hindi na nag-usisa ng detalya ng kontrata ng Smartmatic-TIM at Comelec. Medyo nakakabahala ito kasi kung may mga na-shortcut na batas, kapag may problema balang araw, hindi malalaman kung sino ang mananagot.

Dapat matuto na tayo na ang pag-shortcut sa batas ay hindi solusyon. Ang pinak-klarong ehemplo ay itong pekeng pagka-presidente ni Gloria Arroyo.

Ellen Tordisillas